Бухоро шаҳрида алоқа кабелига зарар етказган мансабдор шахсга чора кўрилди. Бу ҳақда «Ўзкомназорат» ахборот хизмати хабар берди.

Маълум қилинишича, 2021 йил 14 июнь куни вилоятдаги корхоналардан бирида фаолият юритиб келаётган мансабдор А.Н.нинг кўрсатмасига асосан қазиш техникаси ёрдамида магистраль газ қувури ётқизилган. Жараёнда «Ўзбектелеком» АК филиалининг Бухоро шаҳар телекоммуникация боғламасига қарашли «Турун-Бурун» қишлоғи йўналишидаги ҳаво алоқа линияси орқали тортилган оптик толали алоқа кабелида (ВОК-12) узилиш содир этилган. 

«Ўзкомназорат»нинг Бухоро вилояти ҳудудий инспекцияси томонидан ушбу ҳуқуқбузарлик сабаблари ўрганиб чиқилган ва содир этганларга нисбатан Маъмурий ҳуқуқбузарлик тўғрисидаги баённома расмийлаштирилган. 

Қайд этилишича, А.Н. 21 июнда «Ўзкомназорат»нинг Бухоро вилояти ҳудудий инспекцияси қарори билан «Телекоммуникация линиялари ва иншоотларини муҳофаза қилиш қоидалари»га амал қилмаган деб топилган. Шу сабабли унга нисбатан Маъмурий жавобгарлик тўғрисидаги кодекснинг 154-моддаси (Савдо ёки хизмат кўрсатиш қоидаларини бузиш) 1-қисмига асосан маъмурий жарима тайинланган.

Аввалроқ Ўзбекистонда уй-жой фондларининг техник хавфсизлик ҳолатларини ўрганиш натижасида 600 дан ортиқ шахс жаримага тортилгани хабар қилинган эди. Шунингдек, Оққўрғон туман ҳокимининг ўринбосари маъмурий жавобгарликка тортилгани ва Қашқадарёда ҳоким ўринбосарига иккинчи марта маъмурий жавобгарлик берилгани маълум қилинган.