Россия бош вазири Михаил Мишустин Россия ва Ўзбекистон ҳукуматлари раҳбарлари даражасидаги қўшма комиссия йиғилишида Евросиё иқтисодий иттифоқидаги иштирок Ўзбекистонга нима беришини маълум қилди. Бу ҳақда «ТAСС» хабар берди.

Унинг сўзларига кўра, Ўзбекистоннинг Евросиё иқтисодий иттифоқидаги тўлиқ иштироки мамлакат иқтисодиётининг ўсиши учун имкониятлар яратади.

«Ишончим комилки, иттифоқда тўлақонли иштирок этиш Ўзбекистон иқтисодиётининг ўсиши учун қўшимча имкониятлар яратади, шунингдек, мамлакат фуқаролари учун сезиларли устунликлар беради», — дея таъкидлаган Мишустин.

Бош вазир, шунингдек, Россия ва Ўзбекистон ўртасида қўшма лойиҳаларни ишлаб чиқишга, пандемия, шу жумладан, бир қатор бошқа муаммоларга биргаликда қарши туришга чақирган. 

«Биз Россия–Ўзбекистон ўзаро алоқаларини янада юқори даражага кўтаришдан, авваламбор, уни истиқболли қўшма лойиҳалар ва ташаббуслар билан тўлдиришдан ва албатта, биргаликда бугунги кунда юзага келаётган муаммоларга қарши курашишдан самимий манфаатдормиз», — дея қўшимча қилган у.

Аввалроқ Ўзбекистон ва Россия бош вазирлари қўшма комиссиясининг 2-йиғилиши бўлиб ўтиши маълум қилинган. Шунингдек, Ўзбекистон ва Россия омбудсманлари ўзбекистонлик мигрантлар қабулини ўтказгани хабар берилганди.