Россия ва Ўзбекистон коронавирусга қарши «Спутник V» вакцинасини Тошкентдаги «Jurabek Laboratories» корхонасида ишлаб чиқаришни муҳокама қилмоқда. Бу ҳақда Россия Вазирлар маҳкамасимага таяниб, «ТAСС» хабар берди.

Маълум қилинишича, Россия Соғлиқни сақлаш вазирлиги, Роспотребнадзор ва Россиянинг тўғридан-тўғри инвестиция жамғармаси орқали ўзбекистонлик шериклар билан коронавирус инфекцияси тарқалишининг олдини олиш, диагностика қилиш ва уни даволаш бўйича ўзаро ҳамкорлик йўлга қўйилган.

«Ҳамкорлик доирасини кенгайтириш мақсадида ‘Спутник V’ вакцинасини ишлаб чиқаришни Тошкент шаҳридаги ‘Jurabek Laboratories’ корхонасида ташкил этиш масаласи кўриб чиқилмоқда», дейилади хабарда.

Қайд этилишича, Россиянинг тўғридан-тўғри инвестиция жамғармаси ва Ўзбекистоннинг санитария-эпидемиологик фаровонлиги ва жамоат саломатлиги хизмати ўртасида 2021 йил 1 апрелда республикага «Спутник V» вакцинасининг 500 минг икки компонентли дозасини етказиб бериш тўғрисида битим имзоланган.

Аввалроқ Ўзбекистонда «Спутник V» вакцинасини ишлаб чиқариш маҳаллийлаштирилиши хақида хабар берилган. Шунингдек, мамлакатга «Спутник V» вакцинасининг 70 минг дозалик 2-компоненти олиб келингани маълум қилинганди.