Тожикистонда соғлиқни сақлаш муассасаларида коронавирус инфекциясини юқтиришнинг янги ҳолатлари қайд этилди. Бу ҳақда мамлакат Соғлиқни сақлаш вазирлигига таяниб, «Tengrinews» хабар берди.

Коронавирусга қарши кураш бўйича республика штаби йиғилишида касалликнинг қайта аниқланишига «бепарволик, чет элдан келаётган фуқароларнинг ўзини ҳимоя қилиш учун белгиланган муддатга риоя қилмаслик, шунингдек, ниқоблардан фойдаланмаслик» сабаб бўлган.

Таъкидланишича, мамлакатда қайд этилган коронавирус ҳолатларининг аниқ сони кўрсатилмаган. Тожикистоннинг ҳар бир фуқароси ушбу соҳадаги мутахассисларнинг тавсияларини қатъий бажариши, жумладан, зарурат юзага келмаганда кераксиз жойга бормаслик, жамоат жойларида дезинфекцияловчи воситалардан ва тиббий ниқоблардан фойдаланишга чақирилган.

Маълумот ўрнида, 2021 йилнинг 11 январидан буён мамлакатда коронавирус инфекциясининг бирон бир расмий ҳолати қайд этилмаган. 26 январь куни Тожикистон президенти ушбу инфекция устидан тўлиқ ғалаба қозонилганини эълон қилган. Пандемия бошланганидан бери, расмий статистик маълумотларга кўра, Тожикистонда коронавирус юқтириш 13 308 кишида аниқланиб, улардан 90 нафари вафот этган ва 13 218 нафари соғайган.

Аввалроқ Тожикистонда хавфли полиомиелит касаллиги тарқалганди. Шунингдек, Тожикистонда аҳолини коронавирусга қарши эмлаш бошлангани ҳақида хабар берилганди.