Тошкент шаҳри Мирзо Улуғбек туманида эркак қайнопасининг уйига ўғирликка тушди. Бу ҳақда Олий суд ахборот хизмати хабар берди.

Маълум қилинишича, Э.Р. шериги А.С. билан тил бириктириб, ўзининг Мирзо Улуғбек туманида яшовчи қайнопаси Ҳ.С.нинг уйига ўғриликка кирган. Улар ҳеч ким танимаслиги учун юзига қора рангли ниқоб тақиб, бармоқ изини қолдирмаслик учун қўлқоп кийган. Шунингдек, улар темир бўлаги, синтетик арқон ва скотч лентаси ўрами билан қуролланган бўлган. Шу куни улар опасининг уйига келган М.П. уйга кираётган вақтда унинг ортидан ҳужум қилган ҳолда уйга бостириб кирган.

Унинг қўлларини синтетик арқон ва скотч билан боғлаган. Кейин ётоқхонада турган жавон эшигини бузиб, у ердан қайнопасига тегишли бўлган 85 001 227 сўмга тенг миқдордаги пул маблағи, валюта қимматликлари, мол-мулки ва шахсий ҳужжатларини олиб, воқеа жойидан яширинган.

Фуқаро Э.Р.га нисбатан Жиноят кодексининг 164-моддаси (Босқинчилик) 3-қисмининг «б», «в» бандлари ва 227-моддаси (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисми «а» банди билан 7 йил 2 ой муддатга озодликдан маҳрум қилиш жазоси тайинланган.

Шунингдек, унинг шериги А.С.га нисбатан Жиноят кодексининг 164-моддаси (Босқинчилик) 3-қисмининг «б», «в» бандлари ва 227-моддаси (Ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш) 2-қисми «а» банди билан 10 йил 2 ой муддатга озодликдан маҳрум қилиш жазоси тайинланган.

Аввалроқ Фарғонада келин қайнанасининг тилла тақинчоқларини ўғирлагани хабар қилинганди. Шунингдек, Тошкентда 4 нафар қиз хонадонга яширинча кириб, 4 минг долларлик тақинчоқларни ўғирлагани ва Наманганда ўғил ўз уйидан пул ва тилла тақинчоқларни тунагани маълум қилинган.