БМТ ядровий қуролларнинг миллий стратегиялардаги ўрни ошганини қайд этиб, улардан фойдаланиш хавфи юқори эканини таъкидлади. Бу ҳақда БМТ бош котиби ўринбосари Идзуми Накамицу нутқига таяниб, «ТАСС» хабар берди.

Накамицунинг маълум қилишича, ядро қуролидан фойдаланиш хавфи ҳозирда Совуқ уруш тугаганидан бери энг юқори кўрсаткични қайд этган. БМТ эса бу вазиятда эскалациянинг кучайиши, жумладан, кўп қутбли ядро тартибининг пайдо бўлиши, мамлакатлар ўртасидаги зиддиятлар кучайиши ва ядро қуролланиш пойгаси ривожланишидан ҳавотида эканини айтган.

«Биз мунозаранинг етишмаслиги, шаффофлик пасайганини кўряпмиз. Қуролни назорат қилиш режими қулашда давом этмоқда», — дея қўшимча қилган Накамицу.

Бош котиб ўринбосари ядровий кучлар қуролни йўқ қилиш тўғрисида келишиб олишига умид билдирган ва бу ядровий тўқнашув хавфини йўқ қилишнинг энг яхши усули эканини айтган.

Эслатиб ўтамиз, 8 июнь куни БМТ бош котиби Антониу Гутерриш Россия ва АҚШни ядро арсеналларини янада қисқартириш тўғрисида келишиб олишга чақирган. Унинг таъкидлашича, ҳар икки мамлакат расмийлари ядро қуролига оид янги келишувларни ишлаб чиқиши керак. Гутерришнинг сўзларига кўра, бу ушбу соҳадаги янги муаммоларга ўз вақтида жавоб беришга ёрдам беради.

Маълумот ўрнида, эскалация — қуролли тўқнашув, низо ва зиддиятларнинг босқичма-босқич ошиши ва кенгайишини англатади.

Аввалроқ БМТ дунё бўйлаб қанча боладан жанг майдонида аскар сифатида фойдаланилганини маълум қилганди. Шунингдек, ташкилот инсониятни яна бир хавфдан огоҳлантирганди.