Олий ва ўрта махсус таълим вазирлигида бўлиб ўтган йиғилишда икки университет ректори вазир ўринбосари этиб тайинланди. Бу ҳақда Олий ва ўрта махсус таълим вазирлиги ахборот хизмати хабар берди.

Маълум бўлишича, Олий ва ўрта махсус таълим вазирлигида Ўзбекистон Республикаси Президенти маслаҳатчиси Абдужаббор Абдувоҳидов, бош вазир ўринбосари Беҳзод Мусаев ва вазир Абдуқодир Тошқулов иштирокида йиғилиш бўлиб ўтган. Унда сиёсий фанлар номзоди Комил Ҳамидович Каримов вазирнинг биринчи ўринбосари, юридик фанлар доктори Раҳим Расулжонович Ҳакимов вазирнинг фан ва инновациялар бўйича ўринбосари этиб таништирилган.

Маълумот ўрнида, Комил Каримов мазкур тайинловга қадар 2020 йилнинг 17 сентябридан Жаҳон иқтисодиёти ва дипломатия университети ректори лавозимида фаолият юритиб келган. Шунингдек, Раҳим Ҳакимов мазкур тайинловга қадар 2020 йилнинг 28 майидан Тошкент давлат юридик университети ректори лавозимида фаолият юритиб келган.

Аввалроқ Фарғона вилоятидаги 2 та олий таълим муассасасига ректор тайинлангани хабар қилинган. Шунингдек, Туризм ва спорт вазирлигида вазир маслаҳатчиси ва вазирлик аппаратининг бошқарувчиси лавозимига янги тайинлов амалга оширилгани маълум қилинган.