Норматив ҳуқуқий ҳужжатлар муҳокамаси порталига «Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида»ги Президент қарори лойиҳаси жойланди.

Унга кўра, айрим давлат амалдорларининг тадбиркорлик билан шуғулланиши қатъиян тақиқланиши, манфаатлар тўқнашуви билан тузилган шартномалар бекор қилиниши, бунга йўл қўйганлар маҳкамага тортилиши белгиланмоқда. 2022 йил 1 январга қадар «Манфаатлар тўқнашувини тартибга солиш тўғрисида»ги қонун ишлаб чиқилиб, Вазирлар Маҳкамасига киритилади.

Шунингдек, 2021 йил 1 октябрга қадар қуйидагиларга оид таклифлар Вазирлар Маҳкамасига юборилади:

• тадбиркорлик фаолияти билан шуғулланиши қатъиян тақиқланган давлат органлари ва ташкилотларининг мансабдор шахслари ва ходимлари рўйхати;
• коррупцияга, шу жумладан, манфаатлар тўқнашувига йўл қўйилган ҳолда тузилган шартномаларни ҳақиқий эмас деб топиш;
• давлат хизматчиларининг тадбиркорлик фаолиятида иштирок этишини чеклаш.

Бундан ташқари, давлат харидлари порталида манфаатлар тўқнашуви билан боғлиқ хавфларнинг олдини олиш бўйича қуйидаги маълумотларни қайта ишловчи автоматлаштирилган тизимни ишга тушириш мўлжалланмоқда:

• қатнашчининг давлат харидларидаги иштироки тарихи (маҳсулот, хизмат етказиб берувчининг илгари иштирок этган танловлари, бажарган ишлари);
• қатнашчининг бенефициарлари ҳақидаги маълумотлар;
• буюртмачи ва иштирокчи ўртасидаги эҳтимолий боғлиқликлар (қариндошлик, бирга таълим олганлик, меҳнат фаолияти ёки бизнес алоқалари ва бошқалар ҳақидаги маълумотлар).

Аввалроқ Президент фармони билан давлат сирларини сақлаш тўғрисидаги қонун лойиҳаси ишлаб чиқилиши хабар қилинганди. Шунингдек, Ўзбекистонда давлат ташкилотларининг фаолияти очиқлигини таъминлаш тартиби белгиланган.