Россия президенти Владимир Путин халқаро хавфсизлик бўйича IХ Москва конференциясида оммавий қирғин қуролларининг тарқалиш хавфи жиддий ташвиш туғдираётганини маълум қилди. Бу ҳақда «РИА Новости» хабар берди.

Путиннинг сўзларига кўра, хавф минтақавий қуролли тўқнашувлар, трансчегаравий жиноий гуруҳлар фаолияти, гиёҳванд моддалар савдоси ва кибержиноятчилар туфайли ҳам пайдо бўлмоқда. Унинг таъкидлашича, аниқланган муаммоларнинг кўлами ва глобал хусусияти барча давлатларнинг саъй-ҳаракатини бирлаштиришни талаб қилади.

«Бундай жамоавий фаолият, албатта, халқаро ҳуқуқ, БМТ уставининг мақсадлари ва тамойиллари асосида амалга оширилиши керак», — дея қўшимча қилган Россия президенти.

Маълумот ўрнида, Халқаро хавфсизлик бўйича тўққизинчи Москва конференцияси 22–24 июнь кунлари бўлиб ўтмоқда. Бу ҳар йили мудофаа вазирликлари, халқаро ташкилот вакиллари ва нодавлат экспертларни глобал хавфсизликнинг асосий саволларига жавоб излаш учун бирлаштирадиган форум ҳисобланади.

Аввалроқ Путин Россиянинг энг таниқли шахслар рейтингида Сталиндан ортда қолгани хабар қилинганди. Шунингдек, Путиннинг Улуғ ватан уруши ҳақида мақоласи Германия нашрида эълон қилинганди.