Қозоғистоннинг Олмаота шаҳрида коронавируснинг «Нью-Йорк» штамми аниқланди. Бу ҳақда шаҳарнинг бош давлат санитария шифокори Жандарбек Бекшинга таяниб, «Tengrinews» хабар берди.

Олмаота шаҳар Санитария-эпидемиология назорати бошқармаси бошлиғининг маълум қилишича, шаҳарда ўтган ҳафтадан бошлаб ҳар куни фуқароларда коронавирусга қарши ўтказилган ва ижобий натижа қайд этилган ПЗР-текширувларининг скрининги ўтказиб келинган. Коронавируснинг ушбу штамми айнан текширувлар жараёнида маълум бўлган.

«Шаҳарда биринчи марта ‘Нью-Йоркʼ штаммининг пайдо бўлиши эҳтимоли аниқланди. Эсингизда бўлса, бу штамм қишда Американинг Нью-Йорк шаҳрида жуда оғир вазиятнинг юзага келишига сабаб бўлган эди. Айни пайтда олинган таҳлиллар натижалари қўшимча текширувларга жўнатилган», — дея таъкидлаган Бекшин.

Аввалроқ Қозоғистонда коронавируснинг «ҳиндча» штаммга ўхшаш тури аниқлангани хабар берилган. Шунингдек, мамлакатда коронавируснинг «ҳиндча» штамми тарқалишига қарши тайёргарлик ишлари бошлангани маълум қилинганди.