«Маҳаллий давлат ҳокимияти органлари фаолиятига «E-qaror» электрон тизимини жорий этиш чора-тадбирлари тўғрисида»ги Вазирлар Маҳкамасининг қарори қабул қилинди. Бу ҳақда Адлия вазирлиги ахборот хизмати хабар берди.

Маълум бўлишича, барча маҳаллий давлат ҳокимияти органларининг қарорлари ва фармойишлари «E-qaror» электрон тизими орқали амалга оширилади. Ушбу электрон тизимни четлаб ўтган ҳолда қарор ва фармойишларни қабул қилишга йўл қўйилмаслиги белгиланган. Шу билан бирга, қарорларнинг тартибга солиш таъсирини баҳолаш электрон тизим орқали амалга оширилиши айтилган.

Шунингдек, қарор билан мазкур соҳани тартибга солишга қаратилган низом тасдиқлангани маълум қилинган. Низомга кўра, лойиҳа «E-qaror» электрон тизими орқали манфаатдор ташкилотлар билан келишиш учун юборилади. Манфаатдор ташкилотлар лойиҳани 3 кун муддатда иш юритувига қабул қилади ҳамда кўриб чиқади. Лойиҳалар юзасидан белгиланган муддатларда тизими орқали муносабат билдирилмаган тақдирда, лойиҳа келишилган ҳисобланади.

Шу билан бирга, қабул қилинган низомда Адлия вазирлигининг қуйидаги ваколатлари белгиланган:

• вазирлик ҳужжатлар лойиҳаларини фақат электрон тизими орқали қабул қилиниш жараёнларининг доимий мониторингини олиб боради;
• вазирлик мониторинг натижаларига кўра электрон тизим орқали келишиш учун юборилган ҳужжатлар лойиҳалари юзасидан манфаатдор ташкилотларнинг белгиланган муддатда муносабат билдирмаган раҳбар ва масъул ходимларига нисбатан таъсир чораларини қўллайди.

Аввалроқ Ўзбекистонда ягона электрон тиббий карта тизими жорий этилиши маълум қилинган. Шунингдек, Ўзбекистонда маҳкумларни сақлаш ҳолати устидан назорат олиб бориш жараёнлари тўлиқ автоматлаштирилиши хабар қилинган.