Москва шаҳрида 22 июнь куни ўтказилган Ўзбекистон–Россия ҳукумат раҳбарлари даражасидаги 2-йиғилишда мамлакат ҳудудидан ноқонуний олиб кетилган маданий бойликларни топшириш маросими бўлиб ўтди. Бу ҳақда Давлат божхона қўмитаси ахборот хизмати «Bugun.uz»га хабар берди.

Маълум қилинишича, тадбирда ДБҚ Халқаро алоқалар бошқармаси бошлиғи ўринбосари О.Мамажонов ва Федерал божхона хизмати Божхона ҳамкорлиги бошқармасининг Яқин хорижий мамлакатлар билан ҳамкорлик бўлими бошлиғи А.Попов иштирок этган.

Ўзбекистон учун маданий аҳамиятга эга бўлган 29 та қўлёзмалар ва 16 та сопол буюмлар 2016 йилда қонунбузар томонидан юртимиздан яширинча олиб чиқиб кетилган.

Россия Федерал божхона хизмати ва Ўзбекистон Республикаси Давлат божхона қўмитаси, Ўзбекистон Республикаси Маданият вазирлиги билан ҳамкорликда ўтказилган қўшма тадбирлар натижасига кўра аниқланган буюмлардан 9 дона қўлёзма ва китоблар араб, форс ва туркий тилларда ёзилган диний матнлар ва шеърий асарлар бўлиб, тахминан 1644-1880 йиллар даврида яратилганлиги, 16 дона сопол буюмлардан 3 таси эса ўрта асрлар ва янги даврдаги ( XV-XVII асрлар) Самарқанд кулолчилик мактабига мансублиги маълум бўлган.

Ўзбекистон Маданият вазирлиги ҳузуридаги Бадиий экспертиза бошқармасининг хулосасига кўра, «Маданий бойликларнинг олиб чиқилиши ва олиб кирилиши тўғрисида»ги Ўзбекистон Республикасининг қонуни талабларига мувофиқ ушбу буюмлар Ўзбекистон Республикасидан олиб чиқилиши мумкин бўлмаган маданий бойликлар тоифасига тегишли эканлиги аниқланган. 

Таъкидланишича, маданий бойликларни қайтариш тадбири Ўзбекистон ҳукумати билан Россия ҳукумати ўртасида 1994 йил 15 апрелда имзоланган «Ноқонуний равишда олиб чиқилган ва олиб кирилган маданий бойликларни аниқлаш ва қайтариш бўйича божхона хизматларининг ҳамкорлиги тўғрисида»ги Битим талаблари доирасида амалга оширилган.

Эслатиб ўтамиз, Ўзбекистон бош вазири Абдулла Арипов 22 июнь куни Россия бош вазири Михаил Мишустин билан учрашганди. Йиғилишда Россия ҳукумати раҳбари Евросиё иқтисодий иттифоқидаги иштирок Ўзбекистонга нима беришини айтган.