Қўқон шаҳрида бўлиб ўтаётган Туркий кенгаш туризм масалалари вазирларининг VI йиғилишида туризм ва спорт вазири Азиз Абдуҳакимов томонидан Қўқонни Туркий кенгашнинг илк туризм пойтахти сифатида номлаш таклиф қилинди. Бу ҳақда унда иштирок этаётган «Bugun.uz» мухбири хабар берди.

Таъкидланишича, Туркий Кенгаш томонидан «Туризм пойтахти» ташаббусини қўллаб-қувватлаш таклиф қилинган. Вазир эса мазкур ташаббусни маъқуллаб, Қўқон шаҳри номзодини илгари сурган. 

«Туркий Кенгаш томонидан таклиф қилинган ‘Туризм пойтахти’ ташаббусини қўллаб-қувватлашимизни маълум қилган ҳолда унинг воситасида ҳозирда машҳур туризм масканларни эмас, балки сайёҳлик потенциали юқори бўлган шаҳарларни ривожлантиришимиз лозим.

Ўзбекистон томони Туркий дунё ва халқларининг ривожланишида ўзининг алоҳида ўрнига эга, Ипак йўли равнақига муҳим ҳисса қўшган Қўқон шаҳри номзодини илгари суради ва сиздан мазкур шаҳарни Туркий кенгашнинг илк туризм пойтахти сифатида қўллаб қувватлашингизни сўраб қоламиз.

Ўз навбатида, ишонтириб айтаманки, ушбу ташаббус доирасида шаҳарларимиз ўртасидаги туризм алоқаларни ҳар томонлама кучайтиришга қаратилган амалий чора-тадбирлар чиқилади ва муваффақиятли амалга оширилади», — дейди Азиз Абдуҳакимов.

Аввалроқ Қўқонда Туркий тилли давлатлар ҳамкорлик кенгашининг VI йиғилиши бошлангани, унда пойтахт ва туризм шаҳарлардаги аэропорт ва вокзалларда туризм маълумот марказларини ташкил қилиш таклиф этилгани хабар қилинганди.