Шимолий Корея Ташқи ишлар вазири Ри Сон Гвон ҳукуматнинг АҚШ билан ҳеч қандай алоқа ўрнатиш ниятида эмаслигини маълум қилди. Бу ҳақда «The Washington Post» хабар берди.

КХДР Ташқи ишлар вазирлиги баёнотига кўра, Америка билан мунозара вақтни беҳуда сарфлаш ҳисобланади.

«Биз АҚШ билан ҳеч қандай муросага олиб келмайдиган алоқалар учун қимматли вақтни беҳуда сарфлашни хоҳламаймиз», дейилган баёнотда.

Шунингдек, Ри Сон Гвон Шимолий Корея Меҳнат партияси марказий қўмитасининг тарғибот ва ташвиқот бўлими бошлиғи ва КХДР раиси Ким Чен Иннинг синглиси Ким Ё Чжоннинг АҚШга берган жавобини қўллаб-қувватлашини айтган.

«AҚШ вазиятни ўзига таскин берадиган тарзда талқин қилаётганга  ўхшайди. Aгар сиз тахминларингизда адашсангиз, бундан ҳам кўпроқ кутилмаган вазиятларга дуч келасиз», — деган Ким Ё Чжон.

Маълумот ўрнида, 19 июнда Корея Меҳнат партияси марказий қўмитасининг пленуми пайтида Ким Чен Ин унинг мамлакати АҚШ билан ҳам мулоқотга, ҳам тўқнашувга тайёр бўлиши кераклигини айтганди. Ўз навбатида, Байденнинг миллий хавфсизлик бўйича ёрдамчиси Жейк Салливан бунга жавобан 20 июнь куни Пхеньяндан янги таклифларни кутишини маълум қилган.

Аввалроқ Байден Шимолий Корея раҳбари билан учрашувга тайёрлигини маълум қилганди. Шунингдек, Шимолий Корея ҳукумати мушук ва каптарларни ўлдиришни буюргани ҳақида хабар берилган.