Сурхондарё вилоятида 2021 йил якунига қадар 1800 мегаватт қувватли 10 та иссиқлик ва қуёш электр станциялари ишга туширилади. Бу ҳақда вилоят ҳокимлиги ахборот хизмати хабар берди.

Маълум бўлишича, айни пайтда Тошкент, Бухоро, Хоразм, Навоий, Самарқанд, Қашқадарё ва Сурхондарё вилоятларида электр станциялари қурилмоқда. Қурилаётган станциялар фаолияти йўлга қўйилгач, Ўзбекистон энергетика тизимининг умумий қуввати 16 минг мегаваттга яқинлашиб, кўрсаткич 2016 йилга нисбатан 52 фоизга ошади.

Таъкидланишича, 2025 йилгача бу кўрсаткич 25 600 мегаваттгача, 2030 йилга қадар 29 200 мегаваттгача оширилиши режалаштирилган. Бу билан 10 йил давомида умумий қувватни қарийб икки баробарга ошириш кўзда тутилган.

Аввалроқ электр энергетика соҳасида 2021 йил якунига қадар умумий қуввати 1 минг 800 мегаваттга тенг бўлган иссиқлик ва қуёш фотоэлектр станциялари ишга туширилиши маълум қилинган. Шунингдек, Фарғонада қуввати 1200 мегаватт бўлган қуёш электр станцияси қурилиши ҳақида хабар берилган.