Афғонистон мудофаа вазири Бисмиллоҳ Муҳаммадий мамлакатнинг иккинчи вице-президенти Сарвар Данеш билан учрашувда минтақадаги хавфсизлик билан боғлиқ вазият тез орада ўзгаришини маълум қилди. Бу ҳақда «Bugun.uz»нинг Афғонистондаги мухбири хабар берди.

Маълумотларга кўра, иккинчи вице-президент ҳамда мудофаа вазири ўртасидаги учрашув 24 июнь куни бўлиб ўтган.

Иккинчи вице-президент матбуот хизмати берган баёнотга кўра, мудофаа вазири учрашувда хавфсизлик идоралари томонидан «Толибон» ҳаракатининг ҳужумларига қарши курашиш чоралари ишлаб чиқилаётгани ҳамда тез орада вазият ўзгаришини айтган. Ўз навбатида, иккинчи вице-президент Афғонистон ҳукумати мамлакатнинг миллий ўзига хослиги ва ҳудудий яхлитлигини ҳимоя қилиш учун бор кучидан фойдаланишини таъкидлаган.

Сарвар Данешнинг қўшимча қилишича, ҳукумат «Толибон» ҳаракати ҳужумларига қарши оммавий сафарбарлик уюштириш ва армия сафларида миллий бирликни мустаҳкамлаш зарур.

Аввалроқ Афғонистонда «Толибон»нинг бир гуруҳи таслим бўлиб, энди ҳаракатга қарши курашиши маълум қилинган. Шунингдек, Афғонистон ҳукумати делегацияси «Толибон» ҳаракати билан музокара олиб бориш учун Доҳага бориши хабар қилинганди.