Дунёнинг 9 мамлакатидан келган олимлар Исроилда 2011 йилда аниқланган одам бош суягини ўрганиб, у Ерда камида 120 минг йил олдин яшаганини маълум қилди. Бу ҳақда «New Scientist» хабар берди.

Маълум қилинишича, ушбу топилма 2010-2011 йилларда Тель-Авив яқинидаги оҳактош карерида топилган. У ерда, шунингдек, ўн минглаб ноёб асарлар, жумладан, ҳайвон суягига ўйиб ёзилган манба, асбоблар ва одам суяги қолдиқлари аниқланган. Таъкидланишича, олимлар аниқлаган бош суяги ва жағни беш йил давомида ўрганиб, таҳлил қилган. Натижаларда улар 120-140 минг йил олдин яшаган одамга тегишли бўлиши мумкинлиги аниқланган.

Қайд этилишича, жағ суяги оғир бўлиб, неандертал одам суягига ўхшаш, аммо бош суяклари Ҳомо сапиенснинг қадимги аждодлари сингари ингичка бўлган. Ушбу далилларга таяниб, олимлар бош суяги шу пайтгача номаълум неандертал одамига ёки уларнинг дурагайларига тегишли деб тахмин қилган. Шунингдек, Nesher Ramla Homo деб номланган ушбу одам тури 400-120 минг йил олдин Ер юзида яшагани ва топилган қолдиқлар ушбу турнинг сўнгги вакиллардан бирига тегишли бўлганини айтган.

Нешер Рамла Хомо Ўрта Шарқдан Осиё ва Европага саёҳат қилган неандерталларнинг аждодлари ҳисобланади.

Ўз ўрнида, олимлар томонидан илгари сурилган одам турини номлаш танқидларга сабаб бўлган. Хусусан, баъзи мутахассислар яхши ўрганмай туриб ном бериш хато эканини таъкидлаган. «Бу топилмаларни ҳаддан ташқари талқин қилиш ҳисобланади», — деган Макс Планк эволюцион антропология институти мутахассиси Жан-Жак Хублин.

Аввалроқ Буюк Британияда сўнгги динозаврларнинг оёқ излари топилганди. Шунингдек, Ироқда ИШИД томонидан ўлдирилган 123 кишининг суяк қолдиқлари аниқланганди.