Лондон университети коллежи ва Кембриж университети вакиллари коинотнинг дастлабки тарихи бўйича тадқиқотлар ўтказди ва дастлабки юлдуз қачон пайдо бўлганини маълум қилди. Бу ҳақда «EurekAlert» хабар берди.

Натижаларга кўра, коинотнинг дастлабки шакллланишидан 250-350 миллион йилдан сўнг илк юлдузлар порлашни бошлаган. Буни аниқлаш учун олимлар ҳозирда маълум бўлган 9 та энг узоқ галактикани ўрганиб чиққан. Уларнинг Ер билан орасидаги масофаси 13 миллиард йилдан ортиқ бўлган. Шу тариқа, олимлар галактикаларнинг ёшини ҳисоблаб, бу орқали биринчи юлдузлар қачон пайдо бўлганини тахмин қилган.

«Назариётчилар коинот дастлабки бир неча юз миллион йил ичида биринчи юлдузлар ва галактикалар пайдо бўлишидан олдин қоронғи бўлганини айтган. Биринчи марта юлдуз қачон порлашини аниқлаш астрономиянинг асосий вазифаларидан биридир», — деган Кембриж университети доктори Николас Лапорт.

Таъкидланишича, юлдузлар атмосферасидаги атом водороди даражасига қараб юлдузлар ёши аниқланган. Бу кўрсаткич юлдузнинг ривожланиш эволюцияси билан ортиб борган, аммо галактика миллиард ёшга тўлганида пасайишни бошлаган. Бунинг сабаби шундаки, водород чиқиндилари ишлаб чиқарувчи оғир юлдузлар биринчи бўлиб ўзининг ядро ёқилғисини ёқиб, кейин йўқ бўлади.

Тадқиқот шуни кўрсатдики, коинотдаги илк юлдузлар коинот шаклланишидан кейин 250 дан 350 миллион йилгача бўлган вақт оралиғида пайдо бўлган. 

Аввалроқ Ерга ҳар йили қанча космик чиқинди тушаётгани маълум бўлганди. Шунингдек, Россия, АҚШ ва Хитойнинг космосдаги тахминий уруши баҳоланган.