Қирғизистон соғлиқни сақлаш ва ижтимоий ривожланиш вазири Алимқодир Бейшеналиев коронавирус инфекциясига қарши эмланганига қарамай COVID-19’га чалинди. Бу ҳақда «24.kg» хабар берди.

Вазирнинг сўзларига кўра, унда вирусга чалиниш ПЗР тести орқали аниқланган.

«Кеча ўзимни ёмон ҳис қилдим, бугун аҳволим яхши ва бемалол гаплашишим мумкин. Ҳозирда уйдан туриб ишлайман», — дея қўшимча қилган у. Бундан ташқари, Бейшеналиев заҳарли иссиқкўл ўсимлигининг илдизидан тайёрланган дамламани ичишда давом этаётганини айтган.

Маълумот ўрнида, Қирғизистон Соғлиқни сақлаш вазири 29 март куни Хитойнинг «Sinopharm» компаниясининг коронавирусга қарши вакцинаси билан эмланган. Бейшеналиев апрель ойи ўрталарида Қирғизистон шифокорлари коронавирусга қарши иссиқкўл дамламасидан фойдаланаётгани ва уни ўзи ҳам тайёрлашини айтган.

«Дамламанинг соғлиққа ҳеч қандай зарари йўқ. Сиз уни иссиқ ҳолда ичишингиз керак, икки-уч кун ичида ижобий ПЗР текшируви йўқолади ва одам дарҳол ўзини яхши ҳис қилади», — деган у.

Шу ўринда, ЖССТ иссиқкўл илдизнинг дамламаси билан даволаш бўйича маслаҳатларни маъқулламаган. Ташкилот клиник синовлардан ўтмаган дорини рўйхатдан ўтказиш ва аҳоли учун тавсия қилиш мумкин эмаслигини таъкидлаган.

Аввалроқ Қирғизистон президенти Путинга коронавирусга қарши иссиқкўл илдизи ҳақида гапирганди. Шунингдек, Қирғизистонда иссиқкўл илдизи дамламасидан заҳарланиш ҳолатлари қайд этилган.