Қозоғистоннинг биринчи президенти Нурсултон Назарбоев Қарағанда фармацевтика заводида ишлаб чиқарилган «Спутник V » вакцинасининг биринчи дозаси билан эмланди. Бу ҳақда биринчи президентнинг расмий веб-сайтида хабар берилди.

Маълум қилинишича, коронавирусга қарши эмланганидан кейин элбоши қозоғистонликларга санитария-эпидемиологик хавфсизлик чораларини кўришга ва эмланиш кампаниясида фаол бўлишга чақирган.

«Айни пайтда Қозоғистонда 3 миллионга яқин одам эмланди. Мен ҳам бугун коронавирусга қарши вакцина олдим. Барча қозоғистонликларни эмлашни фаол давом эттиришга ва бундан қўрқмасликка чақираман», — дея таъкидлаган Назарбоев.

Биринчи президентнинг сўзларига кўра, вируснинг янги штаммлари пайдо бўлаётган шароитда хасталикка қарши эмланиш жуда муҳим ҳисобланади. 

«Буни ўз соғлиғингиз учун ҳам қилишингиз керак. Биз қийин даврда яшаяпмиз. Буларнинг барчасини биргаликда енгиб ўтишимиз лозим. Ҳаммага чин дилдан соғлиқ ва фаровонлик тилайман», — дея қайд этган Нурсултон Назарбоев.

Аввалроқ Қозоғистон президенти коронавирусга қарши «Спутник V» вакцинаси билан эмлангани хабар берилган. Шунингдек, мамлакат апрелдан маҳаллий вакцинасини оммавий ишлаб чиқаришни бошлаши маълум қилинганди.