Сенат қарори билан Тошкент вилоятининг бир қатор туман ва шаҳарларининг чегара ҳудудлари ўзгартирилди. Бу ҳақда Олий Мажлис Сенати ахборот хизмати хабар берди.

Маълум бўлишича, Сенат аъзолари Тошкент вилоятининг Оққўрғон, Оҳангарон, Бекобод, Бўстонлиқ, Бўка, Зангиота, Юқори Чирчиқ, Қибрай, Паркент, Пискент, Ўрта Чирчиқ, Янгийўл туманлари ва Олмалиқ, Чирчиқ, Ангрен, Янгийўл, Бекобод шаҳарлари чегараларини ўзгартириш тўғрисидаги масалани муҳокама қилган.

Ўзбекистон Конституцияси ҳамда «Ўзбекистоннинг маъмурий-ҳудудий тузилиши тўғрисида»ги қонунга асосан Тошкент вилоятининг юқорида қайд этилган туман ва шаҳарлари чегараларини ўзгартириш таклифи илгари сурилган. Жами ўзгартирилаётган туман ва шаҳарлар чегараларининг ер майдони 17 359,1 гектар бўлиб, шундан 10 084,8 гектари қишлоқ хўжалиги ерларидир.

Шунингдек, Тошкент вилояти шаҳарларини 2021–2030 йилларда ривожлантириш учун зарур бўлган ҳудудларни белгилаш режалаштирилган. Мазкур масала юзасидан Олий Мажлис Сенатининг тегишли қарори қабул қилинди.

Аввалроқ Олий Мажлис Қонунчилик палатасининг йиғилишида Тошкент вилоятидаги шаҳар ва туманлар чегаралари қайта кўриб чиқилгани хабар қилинган. Шунингдек, Шавкат Мирзиёев Тошкент вилоятини иккига бўлиш таклифини бергани маълум қилинган.