Ўзбекистонда ибодат амалларини очиқ ҳавода ўтказиш тавсия қилинди. Бу ҳада Соғлиқни сақлаш вазирлиги ахборот хизмати хабар берди. 

Маълум қилинишича, мамлакатдаги мавжуд эпидемиологик ҳолатдан келиб чиқиб, масъул идораларнинг таклифлари инобатга олинган ҳолда Республика махсус комиссияси томонидан:

• кунлик ва жума намозлари фақат масжиднинг очиқ ҳаводаги майдонлари (очиқ айвонлар, масжид ҳовлиси, масжидга туташ ички кўчалар)да тиббий ниқобда ва оралиқ масофани сақлаган ҳолда ташкил этилиши;
• 65 ёш ва ундан катта ёшдаги фуқаролар ҳамда сурункали касаллиги мавжуд шахсларга улар томонидан диний тадбирларни имкон қадар уй шароитида амалга ошириш;
• республикада фаолият юритаётган бошқа диний конфессияларга мансуб диний ташкилотларда ҳам жамоавий ибодатларни юқоридаги тартиблар асосида амалга ошириш тавсия этилган.

Аввалроқ Тошкент шаҳри «қизил» тоифадаги ҳудуд деб белгилангани ва 28 июндан Тошкент шаҳрига қўшни вилоятлардан автотранспорт орқали ўта зарурат бўлмаган ҳолларда кириш бўйича чекловлар ўрнатилгани ҳақида хабар берилганди. Шунингдек, ССВ карантин даврида кимлар Тошкент шаҳрига кириши мумкинлигини маълум қилган.