Номаълум учар жисмлар (НУЖ) АҚШ миллий хавфсизлигига таҳдид солиши мумкинлиги маълум қилинди. Бу ҳақда мамлакат разведка хизмати ҳисоботига таяниб, «РБК» хабар берди.

Маълум қилинишича, номаълум учар жисмлар ҳақидаги маълумотлар разведка ҳисоботининг барча билиши мумкин бўлган қисмида эълон қилинган.

«НУЖлар парвозларнинг хавфсизлиги борасида яққол хавфларни юзага келтириб, АҚШ миллий хавфсизлигига таҳдид солиши мумкин. Хавфсизлик муаммолари, аввало, тобора зичлашиб бораётган ҳаво муҳитига қарши курашаётган авиаторларга тегишлидир», дейилади ҳужжатда.

Қайд этилишича, разведка хизмати НУЖлар маълумотлар йиғиш учун учирилган хорижий разведкачи қурилмалар бўлиши мумкинлигини ҳам истисно этмаган. Ўтган йиллар давомида эса фақат битта НУЖ билан боғлиқ ҳодисани жиддий назоратга олган.

Умуман олганда, Қўшма Штатлар разведка хизмати 2004 йилдан 2021 йилгача 144 та НУЖ билан боғлиқ ҳолатни қайд этган, аммо уларнинг аслида нима экани ҳамон аниқланмаган. 

«Номаълум учиб юрувчи объектлар бўйича юқори сифатли ҳисоботларнинг чеклангани бизнинг уларнинг табиати ёки нияти тўғрисида аниқ хулосалар чиқаришимизга халақит беради», дея қўшимча қилинган разведка хизмати хабарида.

Маълумот ўрнида, Пентагон 2020 йилнинг август ойида НУЖларни ўрганиш учун махсус ишчи гуруҳ тузилганини эълон қилиб, унинг вазифаси АҚШ миллий хавфсизлигига таҳдид солиши мумкин бўлган НУЖларни аниқлаш, таҳлил қилиш ва рўйхатини тузишдан иборатлигини айтган. 2019 йилда эса ҳарбий самолётлар томонидан тасвирга олинган номаълум учар жисмлар билан боғлиқ 3 та видеони очиқлаган.

Аввалроқ АҚШда аҳоли номаълум учувчи жисмни тасвирга олгани хабар берилган. Шунингдек, америкалик олим ўзга сайёраликлар билан шартнома тузишга чақирганди.