Колумбияда мамлакат президенти Иван Дуке ичида бўлган вертолёт ўққа тутилди. Бу ҳақда «BBC» хабар берди. 

Маълум қилинишича, номаълум шахслар томонидан амалга оширилган ҳужумда давлат раҳбари ҳеч қандай жароҳат олмаган.

«Президент Иван Дуке бўлган вертолёт Сардината муниципалитетидан (Шимолий Сантандер департаменти) чиқиб кетаётганда ҳужум нишонига айланди. Вертолётга камида олтита ўқ отилди, учувчилар ва экипажнинг тажрибаси туфайли вазият тезда ҳал қилинди», дейилади хабарда.

Қайд этилишича, вертолёт бортида президент билан бирга мудофаа, ички ишлар вазири, департамент губернатори ҳамда Кукута мери бўлган. Дастлабки маълумотларга кўра, унга ҳамроҳ бўлганлар ҳам жабрланмаган. Кейинчалик Колумбия президенти унинг самолётига ҳужум қилинганини тасдиқлаган.

Аввалроқ АҚШда президент Байденни ўлдириш билан таҳдид қилган эркак қўлга олингани хабар берилган. Шунингдек, Россияда 150 га яқин черков ва ибодатхоналарга бомба ўрнатилгани маълум қилинганди.