Озарбайжон Мудофаа вазирлиги Арманистон қуролли кучларининг Келбажар туманини ўққа тутгани ҳақида эълон қилди. Бу ҳақда 27 июнь куни «РИА Новости» хабар берди.

Мудофаа вазирлиги баёнотига кўра, 26 июнь куни соат 14:50 дан 27 июнь соат 03:00 гача Варденис туманининг  Йухари Шоржа қишлоғи яқинида жойлашган Арманистон қуролли кучлари Озарбайжон армиясининг позициясига Келбажар вилоятининг Зейлик ва Имамбинаси қишлоқлари йўналишига қарата вақти-вақти билан ўқ узган.

Вазирлик маълумотларига кўра, Озарбайжон армияси шахсий таркибида қурбонлар ва ярадорлар йўқ. Ҳолат эса назоратга олинган.

Ўз ўрнида Арманистон томони Озарбайжон позицияларининг ўққа тутилиши тўғрисидаги баёнотни рад этган.

«Озарбайжон мудофаа вазирлиги Арманистон қуролли кучлари томонидан бир неча соат давомида Гегаркуник вилоятидаги арман-озар чегарасидаги Озарбайжон позицияларини ўққа тутгани ҳақида яна бир ёлғон маълумот тарқатмоқда. Арманистон қуролли кучлари Озарбайжон позициялари томон ўқ узмади. Бундан ташқари, Озарбайжон Мудофаа вазирлиги хабарида кўрсатилган вақтда Озарбайжон томони кетма-кет ўқ узди, унга Арманистон томони жавоб бермади», дейилган Арманистон қуролли кучлари баёнотида.

Аввалроқ Озарбайжон ва Арманистон ҳарбийлари ўртасида отишма содир бўлганди. Шунингдек, Пашинян Озарбайжонга ўғлини барча ҳарбий асирларга алмаштиришни таклиф қилганди.