Телебошловчи Толиб Исроилов Ўзбекистон халқ артисти Тўти Юсупованинг ўлими ҳақида хабар тарқатган эди. Ушбу берган хабари юзасидан талебошловчи халқдан узр сўради. Бу ҳақда «Zamon» хабар берди. 

Толиб Исроилов актриса Тўти Юсупованинг вафоти ҳақида Facebook орқали билгани ва савоб олиш мақсадида ўз саҳифаларида бу ҳақда маълум қилганини айтиб ўтган.

«Бугун 27 июнь — Оммавий ахборот воситалари ва матбуот ходимлари куни. Айнан бугун йўл қўйган хатом туфайли кўпчиликдан узр сўрамоқчиман. Чин дилдан, юрак-юрагимдан узр сўрайман. Кечаси соат 1:42 да Facebook’нинг ‘Моҳият’ номли саҳифасида ‘Ўзбекистонда хизмат кўрсатган артист Тўти Юсупова оламдан ўтди’, деган маълумот коллаж расм билан қўйилган экан. Юрагим шувиллаб кетди. Шошиб қолдим, нега Ўзбекистонда хизмат кўрсатган артист деб ёзишибди, дея. Ўзбекистон халқ артисти-ку, сал шошиб қолишибди-да, деб линкни ўзимга кўчириб олдим. Суратни ҳам олиб, Ўзбекистон халқ артисти, нурли аёл, ўзбек онаси, миллий театр дарғаси, деб тўғрилаб  ёздим.

Аллоҳ гувоҳ, мен ниҳоятда яхши кўрар эдим, ҳозир ҳам яхши кўраман. Ўта меҳрли аёл бўлгани, кўп ижодий жамоаларда бирга бўлганимиз учун менинг меҳрим жуда ҳам кучли. Мен юрак-юрагимдан эзилиб кетдим ва ёшлари улуғ бўлгани учун шундай бўлиши мунмкин-ку ҳаётда, деган ишонч бор эди-да. Бу ҳақда кўпчилик билиши, дуо қилиши керак деган мақсадда, савоб илинжида ёзиб ижтимоий тармоққа жойладим. Кўпчилик дуо қилсин деган мақсадда қўйиб юборибман. Жуда ҳам афсусдаман. Аввало, улардан узр сўрайман, умрлари узоқ бўлсин. Хато қилганимдан жуда қувондим. Нотўғри маълумот берганим учун халқдан узр сўрайман», — деган Толиб Исроилов.

Эслатиб ўтамиз, аввалроқ Ўзбекистон халқ артисти Тўти Юсупова 85 ёшида вафот этгани ҳақида хабар берилган эди. Шундан сўнг Маданият вазирлиги Тўти Юсупованинг вафотини рад этган.