АҚШнинг собиқ президенти Дональд Трамп 2020 йил АҚШда бўлиб ўтган президентлик сайловларини Украинадаги 2004 йилги сайловларга таққослади. Бу ҳақда «ТАСС» хабар қилди.

Келтирилишича, собиқ президент Америкада бўлиб ўтган президентлик сайловларини «аср жинояти» деб таърифлаган.

«Менинг фикримча, ноябрда содир бўлган воқеа аср жиноятидир. Чунки ҳозирда мамлакат чегарасида инқирозга дуч келмоқдамиз ва буларнинг бари бизнинг мамлакатда бўлмоқда», — дея Трамп 3 ноябрь шармандалик экани ва бу сайловда ютқазмаганини таъкидлаган.

Шунингдек, у масофадан туриб овоз бериш билан боғлиқ сохталаштиришлар туфайли сайловлар 2004 йилдаги Украинада бўлган сайлов жараёнларига ўхшаганини таъкидлаган.

«Бу бир пайтлар Давлат департаменти коммунистик мамлакатларда масофадан туриб овоз бериш натижаларини сохталаштиришини танқид қилган жараёндир. Улар 2004 йилда Украинада бўлгани каби овозларни санашни ноқонуний равишда ўзгартирди. Биз ҳали буни исботлаймиз», — деган Трамп.

Унга кўра, худди шундай қоидабузарликлар Детройт (Мичиган штати), Филаделфия (Пенсилвания штати) ва Атланта (Жоржия штати) шаҳарларида содир бўлган.

Аввалроқ Трамп Байденни сайловолди жараёнларида берган ваъдасини бажармаганликда айблаганди. Шунингдек, Трамп Байденнинг сиёсатини кескин танқид қилганди ва Исроилдаги кескинликда уни айблаганди.