Андижонда прокуратура ва ИИБ ходимлари ўртасида тортишув содир бўлгани ҳақида хабар тарқалганди. Бош прокуратура ахборот хизмати мазкур ҳолат бўйича изоҳ берди.

Маълум бўлишича, ўзини прокуратура ходими деб таништирган эркак аввалдан таниши бўлган ички ишлар ходимига қўнғироқ қилиб, ИИБга келтирилган вояга етмаганларни рўйхатга олиш китобини олиб келишни талаб қилгани ҳамда суҳбат давомида улар ўртасида келишмовчилик юзага келгани қайд этилган.

Аудиоёзувдаги фуқаролар Бердақ номидаги Қорақалпоқ университетининг юридик факультети 2-босқичини тамомлаб, иш ўрганиш амалиётига Марҳамат тумани прокуратурасига юборилган талаба Б.Ҳ. ва Марҳамат тумани ички ишлар бўлими ҳуқуқбузарлик профилактикаси бўлими профилактика инспектори Ш.Х. экани аниқланган. 

Таъкидланишича, улар аввалдан бир-бирини таниган ва Б.Ҳ. таниши билан ҳазиллашмоқчи бўлган. Шунингдек, талабага ички ишлар бўлимига келтирилган вояга етмаганларни рўйхатга олиш китобини прокуратурага олиб келиш ҳақида ҳеч қандай кўрсатма берилмагани маълум қилинган.

Аввалроқ Фарғонада прокуратура ходимининг мурожаатчиларни йўқотиш ҳақида топшириқ берган аудиоси юзасидан изоҳ берилган. Шунингдек, Бош прокуратура ходими Олий суд ходимлари билан тил бириктириб, мурожаатларни «бизнес»га айлантиргани ҳақидаги хабарга изоҳ берилган.