Британиядаги автобус бекатида Мудофаа вазирлигининг махфий «HMS Defender» кемаси ва инглиз ҳарбийлари ҳақида батафсил маълумот берилган ҳужжатлари топилганди. Мамлакат мудофаа вазирлиги Twitter’даги саҳифасида махфий ҳужжатлар тарқалишига муносабат билдирди.

Унда келтирилишича, Буюк Британия ҳукумати Қора денгиздаги Россия ҳудудий сувларига кирган кема ҳақидаги ҳужжатлар йўқолиши юзасидан текширув ўтказади. 

«Биз хавфсизликни ниҳоятда жиддий қабул қиламиз. Ҳозирда тергов ишларини бошладик. Ходим зарар ҳақида ўз вақтида хабар берди», дейилган хабарда.

Мудофаа вазирлиги, шунингдек, ўтган ҳафта ушбу ҳодиса тўғрисида бўлимга маълумот берилганини қўшимча қилган. Маълумот ўрнида, ҳужжатлар жами 50 бетдан иборат бўлиб, у 22 июнь куни тонгда Кент графлигидаги автобус бекатида топилган. Ҳужжатларнинг бирида Қрим соҳиллари яқинида Қироллик кемасининг Украина сувлари орқали ўтишига Россиянинг эҳтимолий муносабати муҳокама қилинади. Ҳужжатларда бошқа масалалар, хусусан, АҚШ бошчилигидаги НАТО қўшинлари Афғонистондан чиқиб кетганидан кейин Буюк Британия у ерда махсус кучларни қолдириши тўғрисидаги маълумотлар мавжуд.

Аввалроқ Британияда Путин билан саммит ўтказиш шарти эълон қилинганди. Шунингдек, Британия Россияни душманлик ҳаракатлари юзасидан огоҳлантирган.