Сурхондарё вилояти Денов туманида 25 май куни 4 ёшли қўшнисига уйқу дори ичириб, ўғрилик қилган мактаб ўқувчиси ушланди. Бу ҳақда вилоят Ички ишлар бошқармаси ахборот хизмати хабар берди.

Хабарга кўра, 25 май куни соат 09:30 ларда туманнинг Водий маҳалласида ижарада яшовчи мактаб ўқувчиси М.А. кўчада ўйнаб юрган қўшниси — 4 ёшли Л.М.ни кўриб, уни уйига олиб кирган. Шундан сўнг қизга 4 дона «Амитриптлин» номли дорини ярим пиёла сувга эритиб берган.

Маълум қилинишича, у ухлаб қолганидан фойдаланиб, қулоғида бўлган 1 жуфт 700 000 сўмлик тилла зиракларини ечиб олган. 26 май куни вояга етмаган М.А.га нисбатан Жиноят кодексининг 169-моддаси 1-қисм билан жиноят иши қўзғатилган.

Аввалроқ Самарқандда сейфдан 42 минг доллар ўғирлаган эркаклар ушлангани ва Фарғонада ўзганинг уйидан қарийб 13 миллион сўм пул ўғирлаган аёл ушлангани хабар қилинган эди. Шунингдек, Самарқандда ота-болани болға билан ўлдириб, уйидан 72 миллион сўмлик буюмларни ўғирлаган эркакка ҳукм ўқилгани маълум қилинган.