Хоразмда газ йўқлиги сабаб аҳоли йўлни тўсиб қўйгани айтилмоқда
Хоразм вилояти Боғот туманида аҳоли газ таъминотидан узилгани сабаб йўлни тўсиб қўйгани айтилмоқда. Бу ҳақда туман ҳокимлиги ахборот хизмати хабар берди.
Маълум бўлишича, ҳолат юзасидан ишчи гуруҳ тузилиб, вазият ўрганилган. Вазирлар Маҳкамасининг қарори билан газдан ажратилган маҳаллага газ баллонлари вақтида етказилган, фақат оқар сув муаммоси кўтарилган.
Таъкидланишича, Тозабозор маҳалласининг Олтинқум ва Қўнғирот кўчасидан оқиб ўтувчи Қўнғирот каналидаги сув чиқарадиган насос бузилиб қолгани учун экилган экинларни суғориш муаммо бўлаётганини айтиб, маҳалла раисига мурожаат қилинган. Тозабозор МФЙда ҳолат бўйича маълумотнома туман ҳокимлигига тақдим этилган.
Шунингдек, Қўнғирот каналидаги сув насосини таъмирлаш учун тегишли чоралар кўрилмоқда. Шу билан бирга, аҳолига ичимлик суви, суюлтирилган газ вақтида берилаётгани ва оқар сувнинг тўлиқ етказиб бериш чоралари кўрилгани айтилган.
Аввалроқ Тошкент вилоятида бир гуруҳ аёллар бандлик масаласи бўйича машиналар йўлини тўсиб қўйгани хабар қилинган. Шунингдек, Қашқадарёда бир гуруҳ аёллар юк машинаси уриб юборган 1-синф ўқувчиси вафот этгани сабаб машиналар йўлини тўсиб қўйгани маълум қилинган.
