Ташқи ишлар вазирлиги Ўзбекистон Афғонистонда кескинлик кучайиб бораётганидан хавотирда эканини маълум қилди. Бу ҳақда 28 июнь куни вазирлик веб-сайтида хабар берилди.

Қайд этилишича, Ўзбекистон курашаётган томонларни тинч аҳоли орасида қурбонлар бўлишининг олдини олишга ва куч ишлатишдан тийилишга чақиради.

«Жорий йилнинг 27 июнь куни 44 кишидан иборат Афғонистон чегара қўшинлари ва маҳаллий қуролли гуруҳ вакиллари Шўртепа тумани ҳудудида Ўзбекистоннинг давлат чегарасини бузган. Бир кун аввал, яъни 26 июнь куни чегаранинг ушбу қисмида қўшни мамлакат кучишлатар тизимлари 3 нафар вакилининг Ўзбекистон ҳудудига кириб келиш ҳолати қайд этилган. Барча Афғонистон фуқаролари ўз ватанига қайтарилган. Ўзбекистон ҳудудига бу каби ноқонуний ўтишга уринишлар қатъий равишда бартараф этилади.

Ўзбекистон ҳукумати Афғонистон билан анъанавий дўстона ва яхши қўшничилик муносабатларини давом эттириш, нейтралитетни сақлаш ҳамда қўшни мамлакат ички ишларига аралашмаслик тарафдори эканлигини қатъий маълум қилади», дейилади вазирлик баёнотида.

Маълумот ўрнида, Афғонистонда коронавирус билан боғлиқ вазият кескинлашгани сабаб 22 июнь куни ўзбек–афғон давлат чегараси вақтинча ёпилганди. Шу билан бирга, Афғонистон фуқароларига туристик визалар бериш ҳамда туристик фирмалардан виза талабномаларини қабул қилиш вақтинча тўхтатилган.

Эслатиб ўтамиз, 24 июнь куни ҳам Ташқи ишлар вазирлиги Афғонистондаги вазият юзасидан расмий баёнот билан чиққанди. Унда Ўзбекистон Афғонистондаги, жумладан, чегарадош шимолий вилоятлардаги ҳарбий-сиёсий вазиятнинг ривожланишини диққат билан кузатиб бормоқда. Қўшни мамлакатда зўравонликнинг ортиши чуқур хавотир уйғотаётгани таъкидланганди.

Кейинчалик Президент матбуот котиби Шерзод Асадов Ўзбекистон чегарасини афғон ҳарбийлари бир неча бор кесиб ўтганини маълум қилган.