29 июннинг энг муҳим ва сара хабарлари битта дайжестда!

Ўзбекистон ҳарбий ҳаво кучларининг ҳам тайёргарлиги текширилди. Охирги бир ҳафтада Афғонистон билан чегара бир неча бор бузилган эди. Ҳаво кучларининг тайёргарлигини Ўзбекистон мудофаа вазири Баҳодир Қурбоновнинг ўзи 25 июнь куни текширувдан ўтказган. 

Вазир қирувчи самолётга чиқиб, ҳаво ҳужумидан ҳимоя, шартли объектга зарба бериш ва учиш-қўниш шайлигини кўздан кечирган. Аввалроқ Мудофаа вазирлиги 24 июнь куни ҳарбий округларда режага асосан қўшинларни жанговар шайликка келтириш бўйича амалий машғулотларни бошлаган.

Жанговар тайёргарликларнинг текширилиши бир гуруҳ Афғонистон фуқаролари (шу жумаладан, ҳарбийлар) Шўртепа тумани орқали Ўзбекистон чегарасини бузиб ўтгани билан боғлиқ. Охирги бир ҳафтада афғонлар уч маротаба Ўзбекистонга ноқонуний қочиб ўтди. Биринчи бўлиб 23 июнь куни 53 нафар афғон чегара қўшини ҳарбий хизматчиси ва маҳаллий қуролли гуруҳлар Шўртепа тумани ҳудудидан Ўзбекистонга ўтди. 26 июнь куни эса қўшни мамлакат кучишлатар тизимлари 3 нафар вакилининг Ўзбекистон ҳудудига кириб келиш ҳолати қайд этилган. Ундан бир кун ўтиб чегаранинг ушбу қисмида 44 кишидан иборат Афғонистон чегара қўшинлари ва маҳаллий қуролли гуруҳ вакиллари Ўзбекистоннинг давлат чегарасини бузган.

Қисқача хабар: Туркия президенти Ражаб Тоййиб Эрдўғон 2021 йил охиригача Тошкентга ташриф буюриши режалаштирилган.

Мамлакатга ўзбек-хитой вакцинасининг навбатдаги 1 миллион дозали партияси етиб келди — Ўзбекистоннинг вакцина захираси 6,4 миллион дозага етди. Ўзбекистонга бугун, 29 июнь куни 1 миллион доза «ZF-UZ-VAC2001» вакцинаси олиб келинди. 

Ҳозирда Ўзбекистоннинг вакцина захираси 6,4 миллион дозага етмоқда. Айни пайтга қадар шундан 3,4 миллион дозадан ортиғи вакцинация жараёнларида қўлланилган. 30 июнь куни «ZF-UZ-VAC2001»нинг яна 1 миллион дозаси келтирилиши кутилмоқда.

Бугун — Гурбангули Бердимуҳамедовнинг туғилган куни. Шавкат Мирзиёев уни таваллуд куни билан табриклади. Дастлаб давлат раҳбари Туркманистон президентини таваллуд куни билан самимий табриклаб, унга мустаҳкам соғлик, бахт-саодат ва катта муваффақиятлар, биродар Туркманистон халқига тинчлик-осойишталик ва равнақ тилади. 

Туғилган кунда ҳам актуал масалалар кўтарилмай қолмаган. Президентлар халқаро кун тартиби юзасидан ҳам фикр алмашиб, Афғонистондаги, жумладан, ушбу мамлакат шимолий чегараолди ҳудудларидаги ҳарбий-сиёсий вазиятнинг ривожланишини муҳокама қилди. Бундан ташқари, 2021 йилда Туркманистонда Марказий Осиё давлатлари раҳбарларининг навбатдаги Маслаҳат учрашувини ташкил этиш масалаларига алоҳида тўхталди.

Қисқача хабар: Андижонда TikTok’ка видео олиш учун поезд устига чиқиб, ток урган боланинг олдида телефон бўлмагани аниқланди. У поезд устига TikTok олиш учун чиқмаган. Хайриятки, бола тирик.

Хўш, оламда нима гап?

Улар учрашди: Тожикистон ва Қирғизистон президентлари қирғиз–тожик чегарасидаги можарони муҳокама қилди. Қирғизистон президенти Садир Жапаров ва Тожикистон президенти Эмомали Раҳмон 29 июнь куни юзма-юз учрашди.

Эмомали Раҳмон ҳар қачон муносабатларнинг ҳозирги ҳолати ва истиқболини муҳокама қилишга тайёрлигини билдирди. Садир Жапаров эса икки кунлик (28–30 апрель) уруш учун афсусдалигини айтган. У, шунингдек, иккала томон бундан буёғига қуролли тўқнашувлар содир бўлишига йўл қўймаслиги кераклигини таъкидлаган. 

«Bugun.uz» колумнисти Ҳабибулло Мўйдинов ушбу воқеага бир оз бошқачароқ ракурсдан қаради. Буни унинг карикатурасида кўришингиз мумкин.

Саудия Арабистони шаҳзодаси давлатга хиёнат қилишда айбдор деб топилиб, ўлимга ҳукм қилинди. Қирол Салмоннинг жияни Саудия шаҳзодаси Фаҳд бин Туркий бин Абд ал-Азиз ўлимга маҳкум этилди.

Ҳарбий суд Ямандаги Саудия Арабистони кучларининг собиқ қўмондонини давлатга хиёнат қилишда айбдор деб топган. Қироллик маъмурлари Фаҳд ҳукуматга қарши тўнтаришни ташкиллаштиришда иштирок этган деб ҳисоблаган. Таъкидланишича, Фаҳд 2020 йил сентябрь ойида ўғли билан бирга ҳибсга олинган.

Қирғизистонда давлат аппаратидаги ходимлар штати 3 бараварга қисқартирилади. Қирғизистон президенти Садир Жапаров республикадаги давлат аппаратини оптималлаштириш мақсадида у ерда ишловчи амалдорлар сонини қисқартириш тўғрисидаги фармонни имзолади. 

Маълум қилинишича, Қирғизистон ҳукуматига ишдан бўшатиладиган ишчиларни тегишли маблағлар билан таъминлаш, уларни тадбиркорлик фаолияти асосларига ўргатиш учун зарур чораларни кўриш, тежаладиган маблағларни эса қолган давлат ва коммунал хизматчиларнинг иш ҳақини ошириш учун сарфлаш вазифаси топширилган.

Бугун билан яшанг. «Бугун»да қолинг.