Қирғизистон ҳукумати аввалроқ Қозоғистон томонидан инсонпарварлик ёрдами сифатида жўнатилган унни сотишга қарор қилди. Бу ҳақда Қирғизистон Фавқулодда вазиятлар вазирлигига асосланиб, «Tengrinews» хабар берди.

Фавқулодда вазиятлар вазирлиги ҳузуридаги Давлат моддий захиралари фонди томонидан маълум қилинишича, интернетда Қозоғистондан юборилган уннинг яроқлилик муддати чеклангани тўғрисида маълумотлар пайдо бўлган. Аммо бу ўз тасдиғини топмаган.

«Қозоғистондан 2021 йил май ойида 10 минг тонна миқдорида инсонпарварлик ёрдами орқали энг юқори, биринчи навли ун олинганди, маҳсулот барча сифат кўрсаткичлари бўйича ЕОИИ меъёрий ҳужжатлари ва Давлатлараро стандарт талабларига жавоб беради. Ушбу ёрдам қардош халқ томонидан доимий равишда бериб келинган. Хусусан, 2020 йил коронавирус инфекцияси пандемияси авжига чиққан пайтда ҳам 5000 тонна ун миқдорида инсонпарварлик ёрдами кўрсатилган», дейилади хабарда.

Қайд этилишича, июнь ойидан бошлаб Қирғизистонда 32–35 даража ва ундан юқори ҳаво ҳарорати кузатилган, июлда эса ҳароратнинг янада кўтарилиши тахмин қилинмоқда, бу эса унни қопларда сақлаш шароитларига салбий таъсир кўрсатади.

«Вазирлар Маҳкамаси Қозоғистондан қабул қилинган унни сифат кўрсаткичлари ёмонлашишининг олдини олиш мақсадида сотиш ва ундан тушган маблағни давлат захирасига қўшган ҳолда республиканинг озиқ-овқат хавфсизлигини таъминлашга қарор қилди», дея қўшимча қилинган хабарда.

Авввалроқ Қирғизистонда тожикистонлик фуқароларга авиачипталар сотиш тақиқланганди. Шунингдек, Қирғизистон чегараолди аҳолисига қурол олиб юришга рухсат берилиши мумкинлиги маълум қилинган.