Самарқанд вилотяи Оқдарё туманида давлат кредит бермагани учун эркак ўзини бинодан ташламоқчи бўлди. Мазкур ҳолат юзасидан туман ҳокимлиги матбуот хизмати муносабат билдирди.

Маълум бўлишича, 29 июнь куни ижтимоий тармоқларда Оқдарё туманида бир фуқаронинг давлат кредит бермаётгани учун ўзини юқори қаватдаги бинодан ташламоқчи бўлгани акс этган видеолавҳа эълон қилинган. Туман ҳокимлиги матбуот хизматининг маълум қилишича, Оқдарё тумани Тўрон МФЙ Арпа қишлоғида яшовчи фуқаро Эшқувватов Фозил Жўрабой ўғли 2020 йил апрель ойида ҳунармандчиликка ёғоч маҳсулотлари сотиб олиш учун Микрокредит банкнинг Лойиш филиалидан 30 миллион сўм кредит олган.

Аниқланишича, фуқаронинг ойлик кредит қарзини тўлаш сўммаси 2 миллион 895 минг сўм бўлиб, 2021 йил май-июнь ойлари учун тўловни амалга оширмаган. Ҳозирда фуқаро Фозил Эшқувватовнинг банкдан икки ойлик тўлов қарзи 5 миллион 517 минг сўм бўлиб, банкка ушбу қарзини қайтармаслик учун ушбу воқеани уюштирган. Шунингдек, фуқаро унинг турмуш ўртоғи Маҳлиё Норбоеванинг ҳам Микрокредит банкдан тўланмаган 2 ойлик, жами 2 миллион 50 минг сўм қарздорлиги мавжуд.

Хабарга кўра, фуқарога нисбатан банк томонидан қонун бузилиш ҳолатлари содир этилмаган. Юқоридагилардан келиб чиққан ҳолда туман ҳоимлиги матбуот хизмати ижтимоий тармоқларда «Давлат кредит бермаганлиги учун фуқаро ўзини бинодан ташламоқчи бўлди» деб, нотўғри талқин қилинганини маълум қилган.

Эслатиб ўтамиз, аввалроқ Самарқандда аёл ўзини учинчи қаватдан ташлашга урингани ҳақида хабар берилганди. Шунингдек, Бухорода 51 ёшли аёл ўзини 8-қаватдан ташламоқчи бўлганди.