Саудия Арабистони шаҳзодаси ўлимга ҳукм қилинди
Қирол Салмоннинг жияни Саудия шаҳзодаси Фаҳд бин Туркий бин Абд ал-Азиз ўлимга маҳкум этилди. Бу ҳақда «Middle east Monitor» хабар берди.
Маълум қилинишича, ҳарбий суд Ямандаги Саудия Арабистони кучларининг собиқ қўмондонини давлатга хиёнат қилишда айбдор деб топган. Қироллик маъмурлари Фаҳд ҳукуматга қарши тўнтаришни ташкиллаштиришда иштирок этган деб ҳисоблаган. Айрим мутахассислар, ҳибсга олишда Саудия Арабистони валиаҳд шаҳзодаси ва мамлакат мудофаа вазири Муҳаммад бин Салмон иштирок этганини айтган. Бу билан у Фаҳднинг оиласини давлат хазинасини тўлдиришга мажбурламоқчи экани, чунки мамлакатда иқтисодий аҳвол ёмонлашаётганини билдирган.
Таъкидланишича, Фаҳд 2020 йил сентябрь ойида ўғли билан бирга ҳибсга олинган. Бу Саудия қироллиги оиласи билан боғлиқ биринчи можаро эмас. Жумладан, валиаҳд шаҳзода Муҳаммад, 2017 йилда вертолётдан қулаган шаҳзода Мансур бин Мукриннинг қотиллигига алоқадор деб тахмин қилинган.
Аввалроқ саудиялик журналист Жамол Қошиқчининг ўлими билан боғлиқ янги маълумот берилганди. Шунингдек, Саудия Арабистонида аёлларга ёлғиз яшашга рухсат берилгани хабар қилинган.
