Тошкент шаҳар Ички ишлар бош бошқармаси Жаҳонгир Отажоновнинг ижтимоий тармоқлардаги чиқишларига муносабат билдирди. Бу ҳақда 29 июнь куни бошқарманинг Telegram каналида хабар берилди.

Қайд этилишича, охирги кунларда интернет ижтимоий тармоқларида Тошкент шаҳри Олмазор туманида яшовчи фуқаро Жаҳонгир Отажоновнинг турли номақбул чиқишлари фуқароларнинг эътирозига сабаб бўлмоқда.

Маълум қилинишича, 17 июнь куни Йўл ҳаракати хавфсизлиги хизмати инспектори томонидан Мирзо Улуғбек тумани Олтинтепа кўчасида ҳаракатланиб келаётган «Gentra» тўхтатиб текширилган. Шу пайт ҳайдовчи Алишер Отажоновнинг (Ж. Отажоновнинг укаси) бошқарув ҳуқуқини берувчи ҳужжатлари бўлмагани сабабли автоулов жарима майдонига жойлаштирилган ҳамда айни вақтга қадар тегишли ҳужжатлар тақдим этилмаётгани сабаб вақтинча сақланмоқда.

Ҳозирда фуқаро Жаҳонгир Отажонов ўзининг давлат органлари хизматчиларига нисбатан ҳақоратомуз видеочиқишлари орқали яқинларининг ҳуқуқбузарликларини яшириш, ўзининг маиший муаммоларига омма эътиборини тортишга уринишлари номоён бўлмоқда.

«Мазкур фуқаронинг ҳаракатларида туҳмат ва ҳақорат қилиш аломатлари мавжуд бўлганлиги сабабли ҳолатга тегишли тартибда ҳуқуқий баҳо берилади ва жамоатчиликка қўшимча равишда ахборот тақдим этилади», дейилади хабарда.

Аввалроқ Тошкент ҳокимлиги хонанда Санжайнинг шаҳарда чиқиндилар тўпланиб қолгани тўғрисидаги чиқишига муносабат билдирганди.