АҚШ давлат котиби Энтони Блинкен Америка Ўзбекистон ўз фуқароларини нотинч ҳудудлардан қайтараётганини қўллаб-қувватлашини маълум қилди. Бу ҳақда унинг Италияга ташрифи давомида айтган сўзларига асосланиб, «Reuters» хабар берди.

Маълум қилинишича, давлат котиби Италия пойтахти Римда ИШИДга қарши кураш бўйича 83 давлат томонидан тузилган коалиция йиғилишида нутқ сўзлаган ва мамлакатлардан Суриядаги фуқароларини олиб чиқиб кетишни сўраган.

«Қўшма Штатлар мамлакатларни, шу жумладан, иттифоқчиларни нотинч ҳудудлардаги фуқароларини ватанга қайтариш, реабилитация қилишга чорлайди», — дея таъкидлаган у.

Қайд этилишича, Блинкен ўз фуқароларини ватанига қайтараётган кам сонли мамлакатлардан бири сифатида Ўзбекистон, Қозоғистон ҳамда Италиянининг саъй-ҳаракатларини алоҳида таъкидлаб, АҚШ бу жараённи қўллаб-қувватлашини айтган.

Аввалроқ АҚШ Ўзбекистонда диний эркинликлар соҳасидаги ривожланишни олқишлагани хабар берилган. Шунингдек, «Меҳр» операциялари давомида қанча ўзбекистонлик ватанга қайтарилгани маълум қилинганди.