Халқаро стратегик тадқиқотлар институти дунёнинг 15 та йирик кибер кучлари рўйхатини эълон қилди. Бу ҳақда «C4ISRNET» хабар берди.

Маълум қилинишича, рўйхатда биринчи ўрин муносиб рақобатчилар йўқлиги сабабли АҚШга берилган. Икки йиллик тадқиқотлар доирасида маъруза муаллифлари еттита мезонни, яъни стратегия ва доктрина; бошқариш, буйруқ бериш ва назорат қилиш; кибер разведка имкониятлари; киберҳудудга боғлиқлик; киберхавфсизлик; кибер космосдаги глобал етакчилик ва тажовузкор кибер қобилиятларни инобатга олган.

АҚШ барча мезонлар бўйича биринчи ўринни эгаллаган ягона давлатга айланган. «Иккинчи даражали» мамлакатлар фақат бир қатор тоифаларга жавоб бера олган бўлиб, ушбу давлатларга Россия, Австралия, Канада, Хитой, Франция, Исроил ва Буюк Британия кирган.

Таъкидланишича. Ҳиндистон, Индонезия, Эрон, Япония, Малайзия, Шимолий Корея ва Вьетнамни ўз ичига олган «учинчи даража» баъзи тоифалардагина кучлиликка эга бўлган. Ҳисоботда Хитой кибер салоҳият бўйича АҚШга ўн йилга бормасдан етиб бориши, қолган мамлакатларга эса вақт керак бўлиши қайд этилган.

Аввалроқ Украина кибер қўшинларни яратиш тўғрисидаги қарорни маъқуллаганди. Шунингдек, АҚШ ҳукумати киберҳужум сабабли фавқулодда ҳолат эълон қилган.