Шавкат Мирзиёев 30 июнь куни Тошкент шаҳридаги Ботаника боғида бўлиб ўтган форумда орден ва медаллар билан тақдирланган ёшларга мукофотларни топширди. Бу ҳақда Президент матбуот хизмати хабар берди.

Қайд этилишича, мукофотланганлар ишонч ва эътибор, ёшларга яратилаётган имкониятлар учун Президентга миннатдорлик билдириб, ўқиш ва интилишда фаол давом этиши, янада катта натижаларга эришиб, давлат ишончини оқлашини таъкидлаган.

«Билимли ёшлар — келажак пойдевори. Бугунги ҳаракатларингиз билан ўз келажагингизга асос соляпсизлар. Мен сизлар билан ғурурланаман», — деди Шавкат Мирзиёев. Давлат раҳбари форумга йиғилган йигит-қизлар билан мулоқот қилди. Ёшларнинг фикр ва ташаббусларини қўллаб-қувватлаб, улар бўйича мутасаддиларга кўрсатмалар берган.

«Ёшларга бераётган эътиборимиз натижалар бераётганини кўриб, хурсанд бўлдим. Бугун ҳеч бир соҳа йўқки, ёшлар муваффақиятга эришмаётган бўлса. Ёшларнинг йўлини очиб берсак, уларга елкадош бўлсак, янада улкан натижаларга эришамиз. Менинг энг катта ишонган кучим, давлатимизнинг энг катта бойлиги — ёшлар», — деди Президент.

Тадбир катта концерт дастури билан якунланган.

Эслатиб ўтамиз, Президентнинг 29 июндаги фармонига мувофиқ, ўзининг ижодий ва интеллектуал салоҳияти, танлаган касб йўналиши ва ижтимоий ҳаётда эришган муҳим натижалари билан турли соҳаларда юртимиз равнақига, унинг халқаро обрў-эътиборини юксалтиришга муносиб ҳисса қўшаётган, тенгдошларига ўрнак ва намуна бўлиб келаётган фаол ёшлар орден ва медаллар билан мукофотланган эди.