Туркия вице-президенти Фуат Октай 29 июнь куни Самарқанддаги «Ипак йўли» халқаро туризм университети фаолияти билан танишди. Бу ҳақда Туризм ва спорт вазирлиги ахборот хизмати «Bugun.uz»га маълум қилди.

Қайд этилишича, вице-президентга туризм ва спорт вазири Азиз Абдуҳакимов ҳамда Инвестиция ва ташқи савдо вазири Сардор Умрзоқов ҳамроҳлик қилган. Фуат Октай мамлакатга Ўзбекистон–Туркия муносабатларини таълим соҳасида ва туризм йўналишида ривожлантириш учун университет фаолияти билан танишиш мақсадида келган.

«Университет жамоасининг аксарияти ёш ва куч-қувватга тўла инсонлар, талабалар эса шижоатли эканини кўриб турибман. Булар Ўзбекистон туризмининг келажаги», — деди Туркия вице-президенти.

Учрашувда университет қошида Турк мамлакатлари маданияти ва мероси мактаби» ва «Тарихий меросни реставрация қилиш мактабини ташкил этиш ҳамда соҳани ривожлантириш каби масалалар муҳокама қилинди. Шу билан бирга, Ўзбекистон ва Туркия мамлакатлари педагог, талабалари ўртасида академик алмашинув ҳамда маданият, дин, туризм йўналишлари бўйича икки томонлама диплом дастурларини йўлга қўйиш режалаштирилди.

Таъкидланишича, ташриф доирасида савдо-иқтисодий ҳамкорлик бўйича ҳукуматлараро комиссиянинг VI йиғилиши ҳамда икки мамлакат ишбилармон доиралари ўртасида тўғридан-тўғри алоқаларни рағбатлантириш ва саноат коперациясининг янги лойиҳаларини шакллантиришга қаратилган бизнес-форум бўлиб ўтган.

Аввалроқ Президент Самарқанд шаҳрида очилган кўп тармоқли тиббиёт маркази фаолияти билан танишгани хабар қилинган. Шунингдек, Ташқи ишлар вазирлигида Қатар ташқи ишлар вазирининг Ўзбекситонга ташрифи доирасида икки мамлакат ўртасида ҳаво қатнови тўғрисидаги битим имзолангани маълум қилинган.