Бухоро вилояти Когон туманида бўлиб ўтган тўйда куёвжўралар машиналарда парад уюштирди. Бу ҳақда вилоят Ички ишлар бошқармаси ахборот хизмати «Bugun.uz»га хабар берди.

Қайд этилишича, «Spark» ҳайдовчиси ўз дўстлари билан тўй кортежида хавфли ҳаракатлар содир қилган. Шундан сўнг улар Маъмурий жавобгарлик тўғрисидаги кодекснинг 129-моддаси 1-қисми билан маъмурий жавобгарликка тортилган.

Шунингдек, «Nexia-3»га қизил-кўк ёнувчи мигалка  ўрнатиб олган ҳайдовчи Маъмурий жавобгарлик тўғрисидаги кодекснинг 127-модда 2-қисми ҳамда 129-модда 1-қисми билан маъмурий жавобгарликка тортилган. Ҳужжатлар тўпланиб, Жиноят ишлари бўйича Когон туман судига юборилган.

Бундан ташқари, ушбу йигитлар истиқомат қилаётган маҳаллада ҳолат соҳа мутахассислари томонидан таҳлил қилинган. Келгусида бу каби ҳаракатларни амалга оширмаслик, бундай вазиятларнинг оқибатлари ҳаётий мисоллар орқали тушунтириб ўтилган.

Аввалроқ Хоразмда тўй кортежида қоида бузган «Malibu» ва «Captiva» ҳайдовчиларига чора кўрилгани ҳақида хабар берилганди. Шунингдек, Сурхондарёда тўй кортежида қарама-қарши йўналишда ҳаракатланган «Lacetti» ҳайдовчисига чора кўрилгани хабар қилинган.