Қозоғистонда 1 июлдан бошлаб «Халқ саломатлиги тўғрисида»ги кодекнинг янги қоидаси кучга кирди. Бу ҳақда «Sputnik Қозоғистон» хабар берди.

Унга кўра, эндиликда тамаки маҳсулотларини дўкон ойналарига қўйиб сотиш тақиқланган бўлиб, бу чекишни ташламоқчи бўлган фуқароларни импульсив харидлардан ҳимоя қилиш мақсадида амалга оширилган.

Қайд этиличича, ушбу тақиқ нафақат анъанавий сигаретлар, балки бошқа тамаки маҳсулотларига ҳам таъсир қилади. Уни сотиб олмоқчи бўлганлар эса оқ вараққа қора рангда ёзилган тамаки маҳсулотлари рўйхатини ўқиб, ўзига кераклисини танлаб олади. Рўйхат ёзилган қоғозга ҳар қандай график расм ёки суратлар жойлаштириш тақиқланади. Рўйхат кўриб чиқилгандан сўнг харидорга унинг талабига биноан тамаки маҳсулоти кўрсатилиши мумкин.

Бундан ташқари, 1 июлдан бошлаб бир қути сигаретнинг чакана нархи 520 тенге (13 минг сўмга яқин) этиб белгиланган. Минимал нарх 2021 йил 31 декабргача амал қилади. Шундан сўнг ҳар олти ойда сигаретларнинг минимал нархи босқичма-босқич 600 тенгега (15 минг сўмгача) оширилади.

Аввалроқ Қозоғистонда ҳокимларни сайлаш тартиби йўлга қўйилгани ҳақида хабар берилганди.