Сувайш канали маъмурлари март ойида кемалар ҳаракатини тўсиб қўйган «Ever Given» контейнер кемасига эгалик қилувчи «Evergreen» компанияси билан 540 миллион долларлик товон пули тўлаш тўғрисида келишувга эришди. Бу ҳақда «Известия» хабар берди.

Маълум қилинишича, томонлар ўртасида ҳар қандай шикоятлардан бош тортиш бўйича битим имзоланган. Келишув Сувайш канали раҳбарияти компанияга қарши даъво миқдорини 916 миллион доллардан 540 миллион долларга камайтиргандан сўнг амалга ошган.

Маълумот учун, Иқтисодий ва хўжалик ишлари суди канал адвокатларининг илтимосига биноан томонларга музокараларни давом эттириш ва халқаро келишувга тинч йўл билан эришиш учун суд мажлисини 4 июлга қолдирганди. 

Таъкидланишича, Сувайш канали маъмурияти қутқарув ишлари обрўсига зиён етиши ва йўқотилган фойдани қоплаш учун 916 миллион доллар товон пули талаб қилган, кейинчалик ушбу миқдор камайтирилган. «Ever Given Shoei Kisen»нинг япониялик эгалари ва унинг суғурталовчилари Миср судининг қарори асосида кеманинг мусодара қилиниши юзасидан шикоят қилган. Музокаралар 19 июнгача давом этган ва кема эгалари янги таклиф билан чиққан. Маълумотларга кўра, «Shoei Kisen» 150 миллион доллар тўлашни таклиф қилганди.

Аввалроқ «Ever Given» кемасининг Сувайш каналида тиқилиб қолишига ким айбдор экани айтилганди. Шунингдек, Миср Сувайш каналининг «Ever Given» контейнер кемаси тиқилиб қолган қисмини кенгайтириш маълум қилинганди.