Тошкент вилояти Ички ишлар бош бошқармаси 1 июль куни фуқаро М.Ҳ.нинг калтакланиши бўйича маълумот берди. Бу ҳақда бошқарма матбуот котиби Бобур Тўлаганов шахсий Telegram каналида хабар берди.

Қайд этилишича, 1 июль куни Telegram’даги Муфаса канали маъмури фуқаро М.Ҳ. номаълум шахс томонидан калтаклаб кетилганлиги ҳақида пост қолдирган ва бу ижтимоий тармоқда муҳокамаларга сабаб бўлмоқда. Блогернинг ёзишича, у куч ишлатар тузилмалар ходимларини танқид қилгани учун калтакланган бўлиши мумкин.

Маълум бўлишича, 2021 йил 1 июль куни соат тахминан 08:00 да Ўрта Чирчиқ тумани ички ишлар бўлимига шу туман Тинчлик маҳалласида яшовчи 1988 йилда туғилган М.Ҳ. (блогер) ўзининг яшаш уйи олдида бир нафар номаълум шахс томонидан тан-жароҳати етказганлиги ҳақида хабар келиб тушган.

Мазкур хабар юзасидан туман ИИБ ходимлари томонидан М.Ҳ. билан дастлабки суриштирув ишлари олиб борилган. Унга кўра, фуқаро М.Ҳ. соат тахминан 07:45 да уйидан чиқиб, дарвоза олдида танишини кутиб турган. Шу вақтда унга нотаниш бўлган шахс ёнига келиб, ундан бу Хуршид исмли фуқаронинг уйими деб сўраган.

Ҳ. эса унга Хуршид исмли фуқарони танимаслигини айтган вақтида, номаълум шахс Ҳ.ни бўйин қисмига уриб, ерга йиқитганлигини ва қорин қисмига тепган вақтда ҳушини йўқотганлигини ва қолган нарсаларни эслай олмаслигини ҳамда ушбу номаълум шахс воқеа жойидан яширинганлиги аниқланган.

Ушбу ҳолат мурожаат вақтининг ўзида туман ИИБдан рўйхатдан ўтказилиб, қонуний чора кўриш учун ижрога қаратилган. Шунингдек, М.Ҳ. олган тан-жароҳати оғир даражасини аниқлаш мақсадида, туман Судга оид тиббий экспертизага йўлланма берилган. Ҳозирда номаълум шахсни аниқлаш мақсадида воқеа жойида дастлабки тезкор-суриштирув ишлари олиб борилмоқда.

Аввалроқ Бухорода археолог ва унинг шериги аёллар томонидан калтаклангани юзасидан муносабат билдирилганди. Шунингдек, Қашқадарёда аёл бир нечта йигит томонидан калтаклангани сабаби маълум бўлган.