Хоразм вилояти Питнак шаҳридаги автомобиль заводида ишлаб чиқарилаётган «Damas» ва «Labo»нинг янгиланган моделлари нархи эълон қилинди. Бу ҳақда «UzAuto Motors» расмий Telegram каналида хабар берилди.

Қайд этилишича, мазкур автомобиллар ўрта ва кичик бизнесни қўллаб-қувватлаш ҳамда ривожлантириш мақсадида ишлаб чиқарилмоқда. Автомобиллар учун шартномани 5 июлдан бошлаб компаниянинг расмий дилерларидан олиш мумкин.

«‘UzAuto Motors’ АЖ компанияси бозор эҳтиёжларидан келиб чиқиб, ‘Damas’ автомобилининг тўрт ўринли модификациясини (ўриндиқлар учинчи қаторисиз) ва борт қанотларисиз ‘Labo’ моделларини ишлаб чиқаришни бошлаганини маълум қилади», дейилади хабарда.

Янгиланган автомобиллар харидорларга қуйидаги нархларда тақдим этилади:

• «Damas» — 77 790 000 сўм
• «Labo» — 76 891 000 сўм.

Эслатиб ўтамиз, «UzAuto Motors» 21 май куни «Дамас» ва «Лабо»нинг янги моделларини намойиш қилганди. Шунингдек, компания директори қайси автомобиль нархи тушиши кутилаётганини айтганди.