Байден маъмурияти НАТО билан қўшинлари Афғонистондан сентябргача чиқиб кетгунга қадар Марказий Осиёдаги 3 та давлатга «Толибон» ҳаракатидан қочаётган 9000 га яқин афғонистонлик фуқарони ҳудудига вақтинча жойлаштиришни сўради. Бу ҳақда «Bloomberg» хабар берди.

Исми сир сақланишини хоҳлаган маъмурият ходимларининг хабар беришича, бу билан АҚШ Қозоғистон, Тожикистон ва Ўзбекистондан Америка ҳарбий кучларига ёрдам кўрсатган ва асосан таржимон бўлиб ишлаган 9 минг нафар афғон фуқароларини назарда тутган.

Таъкидланишича, ушбу битим Афғонистон масаласида Марказий Осиё мамлакатлари билан кейинги ҳамкорликни йўлга қўйишни кўзда тутади. 

Нашрнинг келтиришича, Ўзбекистон ва Тожикистон ташқи ишлар вазирлари шу ҳафта Вашингтонда бўлиб, томонлар АҚШга ўз ҳудудларидан кузатув ва разведка ишларини олиб боришга имкон берадиган келишувни муҳокама қилмоқда.

«АҚШ визасини олмоқчи бўлган афғон фуқаролари бу янгиликдан ҳайратланди. Бу тезда амалга ошишига ишонамиз, чунки хавфсизлик ҳақиқатдан ҳам ёмонлашмоқда ва бу мамлакатлар Афғонистонга қараганда анча хавфсизроқ», — деган 2 июль куни АҚШ ҳукумати томонидан молиялаштириладиган лойиҳанинг афғонистонлик ходими. 

Ўз навбатида, АҚШ Давлат департаменти хабарга изоҳ беришдан бош тортган.

Аввалроқ Байден Америка ҳарбий кучларига ёрдам кўрсатган афғон фуқароларини ҳимоясиз қолдирмаслигини маълум қилган.