Тошкент шаҳар Шайхонтоҳур туманида маст ички ишлар ходими 80 ёшли эркакни ниқоб тақмагани учун куч ишлатиб олиб кетмоқчи бўлгани ҳақида хабарлар тарқалди. Ички ишлар вазирлиги ахборот хизмати ҳолат юзасидан «Bugun.uz»га маълумот берди.

Хабарга кўра, 8 июль куни соат 10:40 да Шайхонтоҳур туманида яшовчи 1972 йилда туғилган Д.М. 102 га қўнғироқ қилиб, отаси 1935 йилда туғилган А.М. маст ҳолда уйида жанжал келтириб чиқаргани ҳақида хабар бериб, чора кўришни сўраган. Орадан ҳеч қанча вақт ўтмай, воқеа жойига Шайхонтоҳур тумани ИИБ профилактика хизмати катта инспектори, майор Улуғбек Яхшибоев етиб борган.

Таъкидланишича, инспекторнинг вазиятни аниқлаштириш ва маст фуқарони ички ишлар бўлимига олиб боришга уриниш пайтида қўшнилар можарога аралашган. Воқеалар тўғрисида тўлиқ маълумотга эга бўлмаган (хусусан, ўғлининг навбатчилик пунктига қўнғироқ қилгани ва уйнинг ичида юзага келган низолар тўғрисида) қўшнилар нотўғри хулосалар чиқариб, можаро қўзғатиб, инспекторнинг ишига аралашишга уринган.

Қайд этилишича, катта профилактика инспекторига нисбатан Тошкент шаҳар Ички ишлар бошқармаси раҳбарияти расмий текширув тайинлаган. Унинг ҳаракатлари қонунчиликка мувофиқлиги бўйича синчковлик билан ўрганиб чиқилади.

Aввалроқ Бухорода эркак ИИБ ходимига қаршилик кўрсатиб, уни ургани ҳақида хабар берилганди. Шунингдек, Қашқадарёда маст эркак ИИБ ходимининг бошига шиша идиш билан ургани хабар қилинган.