Ўзбекистонда радарлар ноқонуний жарима ёзаётгани ҳақида хабарлар тарқалганди. Йўл ҳаракати хавфсизлиги бош бошқармаси ахборот хизмати ҳолат юзасидан муносабат билдирди.

Маълум бўлишича, Президентнинг «Йўл ҳаракати хавфсизлигини таъминлаш тизимини янада такомиллаштириш чора-тадбирлари тўғрисида»ги қарорида:

• ҳуқуқбузарликларни ўз вақтида аниқлаш ва уларга чек қўйиш, назоратнинг юқори самарадорлигини таъминловчи йўл ҳаракатини автоматлаштирилган тарзда тартибга солиш, видеокузатув ва йўл ҳаракати қоидалари бузилишини қайд этиш тизимларини, бошқа техник воситаларни янада кенгайтириш;
• йўлларни сақлаш ва уларни йўл белгилари, ахборот кўрсатгичлари, йўл ҳаракатини тартибга солишнинг бошқа техник воситалари билан жиҳозлаш бўйича ўрнатилган талабларга сўзсиз риоя этилишини таъминлаш;
• фуқаролар орасида йўл ҳаракати иштирокчиларининг йўл ҳаракати қоидаларига риоя қилиш маданиятини оширишга қаратилган самарали тушунтириш ишлари тизимини, шу жумладан аҳоли орасида тарғибот-ташвиқот ишларининг шакл ва усулларини кенгайтириш ҳамда такомиллаштириш орқали ривожлантириш;
• йўллар ва темир йўлни кесиб ўтадиган жойдан фойдаланиш, аниқланган авариявий ўчоқларни йўқ қилиш, ҳаракат тезлигини чеклаш бўйича чораларни кўриш юзасидан аниқ вазифалар белгилаб берилган.

Таъкидланишича, қарор ижросини таъминлаш мақсадида Германиянинг «Atlas International» компанияси томонидан йўл ҳаракати қоидалари бузилишини фото-видео фиксация қилишнинг автоматлаштирилган тизимини Андижон, Наманган, Тошкент ва Фарғона вилоятлари ҳудудида жорий этиш амалга оширилмоқда.

Шунингдек, ЙҲХББ хабарида тезлик меъёрлари бажарилишини назорат қилишда, қоидабузарликларни жиловлашда автомобиль йўлларига ўрнатилаётган радарлар зарур омил ҳисобланиши ҳамда уларнинг ўрнатилишидан асосий мақсад йўлларда ҳаракат хавфсизлигини таъминлаш, йўл-транспорт ҳодисаларининг олдини олиш экани маълум қилинган.

Эслатиб ўтамиз, аввалроқ Ўзбекистондаги барча фоторадар ва камераларнинг жойлашган ўрни маълум қилинган. Шунингдек, Фарғонада ЙПХ инспектори ўрнатган йўл радар назоратида эканини билдирувчи 5.43 йўл белгисини олиб ташлаган эркакка суд ҳукми ўқилгани хабар қилинган.