Туркия Грецияга қарши Эгей денгизининг шарқий қисмидаги оролларни ҳарбийлаштиришга йўл қўймаслик тўғрисидаги келишув шартларини бузгани сабабли БМТга шикоят билан мурожаат қилди. Бу ҳақда «Anadolu» хабар берди.

Келтирилишича, Туркиянинг БМТдаги доимий вакили Феридун Синирлиўғли томонидан имзоланган тегишли хат БМТ бош котиби Антониу Гутерришга юборилган.

«Яна бир бор эътиборимни Афинанинг Эгей ва Ўрта денгиздаги оролларга қурол жойлаштирилишини тақиқлаш тўғрисидаги келишувлардан келиб чиқадиган мажбуриятларни бажармаганига қаратмоқчиман», дейилган тақдим этилган ҳужжатда. Хатда ушбу оролларнинг, шу жумладан, Меиснинг Туркиянинг материк қисмига географик яқинлиги эсга олинади.

«Оролларни ҳарбийлаштиришни тақиқлаш 1923 йилдаги Лозанна тинчлик шартномаси ва 1947 йилдаги Париж тинчлик шартномаси билан белгилаб қўйилган. Грециянинг ҳаракатлари Туркиянинг хавфсизлигига ҳақиқий ва жиддий таҳдидни англатади», дейилган мактубда.

Таъкидланишича, агар Афина ўз мажбуриятларига қайтмаса, у юқоридаги хатда келтирилган ҳужжатларга асосланиб бошқа талаблар қўйиш, шу жумладан, суверен денгиз юрисдикциясини белгилаш ҳуқуқини йўқотади.

Аввалроқ Туркия Грецияга жавобан халқаро сувларни ҳарбий машқлар зонаси деб эълон қилганди. Шунингдек, Хитой кемалари Япония сувларининг баҳсли ҳудудига кириб борганди.